Гатун йикъар

Гатун юкъуз чуьнуьх хьана циферик
Рагъ чахъ галаз "чуьнуьхгумбат1" къугъазва.
Яргъирушан  ирид жуьре киферик
Ц1айлапандин марвард зарар юзазва.

Яргъи гатуз Ракъин к1аник чранвай,
Аялди хьиз Чили Цавуз дадзава.
Циферини  чанда бегьем наз авай,
Лацу партал алук1на рик1 падзава.

Хъчар к1ват1из экъеч1зава чигадлай
Къари - баде вахчагдин чан юзуриз.
Физва салуз гъвеч1и хтул чирк1адлай
Сенфиз цавай аватай гъед жагъуриз.

Кьил агъузна акъвазнава п1инид тар,
Са секинвал авахьзава зи чандиз,
Кас гьуьлелай къарагъзава мили гар,
Хуш легьзеяр багъишзава арандиз.

Мет алатна къугъвазава балаяр,
Гагь уьлуькьиз, гагь дуст хъжез авазва.
Хьруьн к1ана йиргазава талаяр,
Хуьрлинк1, гъуьлягъ шур-шурдивди агъвазва.

Хурушумдик югъ элкъвейла къипери
Къур - къур ийиз ванер твада алахъна.
Руг хкатда к1вачерикай хиперин
К1елер зверда мягьледилай алахьна.