Шиир кхьиз илгьам къведа,
Пагь,ви вилер заз хъуьреда.
Цавай гъетер гъиз кlан жеда,
Акунмазди вун.
Чанда шадвал лап гьатда зи,
Билбил хьиз мез рахада зи,
Куьгьне дердер квахьда зи,
Акунмазди вун.
Цlвелин тарци гъида бегьер,
Экуь жеда вацран мичlер,
Пехил жед вал бязи цуьквер,
Акунмазди вун.
Ачух жеда билбилдин сес,
Акатда зак ашкъи,гьевес,
Ахквадач заз жуван мирес,
Акунмазди вун.
Пашман гуьгьуьл лап катда зи,
Чандиз лезет хкатда зи,
Пlузаррик хъвер акатда зи,
Акунмазди вун.
Къумбай жеда хьи зи гьалар,
Аквадач заз маса рушар,
Зирек лекьрез жеда ухшар,
Акунмазди вун.
Рубрика
Добавить комментарий