Шагь-Эмир Мурадов

Дагъустандин халкьдин шаир Мурадов Шагь-Эмир Билалович 1913-йисуз Самур округдин Къуруш хуьре дидедиз хьана. Ада Ахцегьрин юкьван мектеб ва Дагъустандин пединститут куьтягьна. Гзаф йисара Ахцегьрин ва Миграгърин мектебра муаллимвал, Лезги радиодин ва "Дуствал" альманахдин редакторвал, "Коммунист" газетдин жавабдар секретарвал авуна.
Ш. Э. Мурадован сифте шиирар печатдиз 1929-йисуз акъатна. Адан къелемдикай цIудралди шииррин, манийрин ва поэмайрин кIватIалар: "Хушбахт Дагъустан", "Лацу лифер", "Дагъвидин манияр", "Рахазва Шагьдагъ", "Рагъ ва муьгьуьббат", "Шалбуздин шагьвар", "Гатфарин гьевес", "Инсанвилиз баркалла!" ва мсб. хкатна. Стха халкьарин шаиррин эсерар лезги чIалаз таржума авуна.
Ш. Э. Мурадова лезги шиират цlийи везинралди ва фикирралди девлетлу авуна. Ам "Дагъустандин халкьдин шаир" тIварцIиз лайихлу хьана.
Шаир 1996-йисуз Магьачкъалада кечмиш хьана. Заридиз 2000-йисуз хайи хуьре художник скульптор Гь.Гьейбатова теснифнавай гуьмбет эцигна.

Акимов Къ. Х. «Лезги зарияр»