КIан я заз

КIан я заз рагъ хьана нур гун чилериз,
КIан я заз акьул гун пичIи кьилериз,
Темен гун акьуллу веледар авай
Дидейрин, бубайрин чими гъилериз.

КIан я заз къвал хьана чикIин никIериз,
КIан я заз атир гун вири цуьквериз.
Уьмуьрдин верцIивал кIанарун патал
Гьахь ийин жегьилрин къени рикIериз.

КIан я заз нагагьдай цIайлапан хьана
Алугин пехилвал, ийин кармашар.
КIан я заз дуьньядин вири инсанар
Сад-садав агудна ийин юлдашар.

КIан я заз гьар хуьре мехъер-мел хьана,
Цаварай хъсанвал кьурай сел хьана.
КIан я заз рикIивай, зи кIани дустар,
Гьар садан далудихъ вичин эл хьана.