Цlарарин къуват

Лугьузва къе, къимет амач шаирдиз,
Шиирарни ни к1елзама?- лугьузва,
Анжах кьарай, мажал тагуз факъирдиз,
Аруш жезва ц1арарин ц1иргъ, тухузва.

И патахъни, а патахъни, яргъариз,
Гьар мензилрин рекьер-хвалар ат1узва,
Хъуьт1уьн цик1из бахшай къвезмай гатфариз
Шикилдай мад зулун сифет кьат1узва.

Рап-рапзавай гъетери хьиз цаварин,
Садбуру чим гуда, садбур къайи я,.
Са бязибур къагьриманрин турарин 
Халис алмас мурцарлайни хци я.

Чандик ифин, къалабулух кутазвай
Эк1я жезва ц1арар чарчел дафтардин,
Ц1ун ц1елхемар, к1утадкай чад гатазвай 
Хкатзава, на лугьуди, уст1ардин.

Чи вахтариз Марин, Саид хкизва- 
Ван ийиз таз алакьайбур гафарив!
Илгьамдин звал акъалтзавай дилизва,
Гьарайдиз гьай вахкуз тадай рагарив!

Ктабдин чар артух хьанва  тарихдин,
Къанни са виш йисаризни акъатна,
Ават1ани санбар крар тарифдин,
Гьа са азар кьиле физвач хкатна.

Гагь туьхуьнда, гагьни фад-фад чк1изва
Къаршиламиш ийидайла тамамдиз,
Къужахдиз физ, хушуналди кит1изва,
Пич1и нефсер, икрамзавай гьарамдиз.

Акваз буьркьуь, ван къвез биши ийизва,
Рахайт1ан мез, файда авач рахункай,
Зегьерлу к1венк1 к1вадриз агъу диризва,
Вегьез хилер, тергиз ц1ирер чил кьунвай.

Жанлу тарар алугариз элкъвезва,-
«Хьайиди хьуй, зи девирда бес жеда»,
Пакад йикъан умуд ат1уз къвекъвезва,-
«Авачирдахъ, лагь вучиз зун шез жеда?»

Аксибуру желб ийизва къуватар- 
Дериндиз сух жезват1ан к1венк1 жендекдиз,
Эхийизвай  ц1угъадаллаз азабар,
Дурум гузва, аквазват1ан гьелекдиз.    

Лугьузва къе, къимет амач шаирдиз,
Шиирарни ни к1елзама?- лугьузва,
Анжах кьарай, мажал тагуз факъирдиз,
Аруш жезва ц1арарин ц1иргъ, тухузва…